HABIA

 

haziren batetik sortuko zen noski

azal erko adar oker

entziklopedia botanikak ez dio sarrerarik eman

landare berezia da inondik ere

 

begiramenez kimatzen dut

osasuntsu nahi nuke beti

su egur ona egiten du

inor edo beste izutzeko erre indarrekoa

 

alegeragoa ageri da mendebalak zafratu ostean

zenbait kanturen akordua gordetzen du altzoan

zainak luze eta enborra malgu

susmoa hartua nago ez dudala zurruntzen ikusiko

 

aski du eguzki printzarik lotsorrena

izerdia irakiten jartzeko

komeni baino goizago loratzen da

ondikotz

hotzaldi atzeratuek zapuztu egiten dute beti

 

euriaren zarpaila

jausitako petaloak hondatzen

emanen du fruiturik halako batean

 

gerizpe gozoa

azalean marka ugari

geziak zauritutako bihotzik ere bai

 

ez da hosto iraunkorrekoa

urtero berritzen da

eta halaz ere

eta halaz guztiz ere

badauzka orritxo egoskor batzuk

korronte artistiko bortitzenek ezin eraitsiak

 

landare arrunta da oso baina

ez da lerratzen ez da lerrotzen baditu bere zerak

 

 

 

© cc-by-sa Koldo Izagirre

 


susa-literatura.com