Jose Garmendia Arruebarrenak
egin zuen poesi lan horien guztien bilketa eta 1978an "Iztueta'ren olerkiak"
liburua argitaratu Kardaberaz Bilduman. Liburu hori da webgune honetan topa
dezakezuna.
Zaila da jakitea
kasu guztietan testua Iztuetarena ote den, sarritan berak bildutakoa edo
moldatutakoa izaten baita. Asko eta asko hark egindako historia, kanta
eta dantza bildumetatik jasotakoak dira, eta ez dago oso garbi berorietan
noraino iristen den Juan Ignazioren beraren ekarria. Nolanahi ere den,
testu bakoitzean topatuko duzu Jose Garmendiak berak horrixe buruz idatzitako
oharrak.
Zaldibiar hau XIX. mende hasierako euskal idazleetarik
ia bakarra da apaiz ez dena. Larramendi eta Astarloa apologisten eraginpean,
haiek ez bezala, euskaraz eman zuen bere onena. Batez ere etnografo eta
historiagile bezala ezaguna bada ere, hainbat poema eta bertso-sail idatzi
zizkigun. Erromantizismo garaiko poeta petoa, Iztuetak bertso-jartzaile
eta kantugile ere jardun zuen.