Emeterio Arreseren koadernoa

        "Txindor-en geroztiko neurtitzak" oharra ipinita, hainbat poema bildu zituen Emeterio Arresek koaderno batean eskuz idatzirik. Javier Bello Portu musikariari eman zizkion: "Gaur emen, biyar an, etzi Jainkoak daki nun, ijituen eraz toki-aldakor nabillen ezkero, urte batzuen buru olerki-txorta onek aize-ezkutu edo babes-giro atsegiñik arkituko ez ote dun bildur naiz ta... nere bertso-xemeok galdu ez ditezen, zure zaipean gogoz ar ditzazu, Javier". Lagapen egunaren datarik ez dakar; kontuan hartuta "Gainbeeran txapalda bat" poemak (azkenengoak) 1949ko martxoaren 3ko data duela, 1949-1954 bitartean izan behar zuen.

        Javier Bello Portu hil ostean, haren ondarean aurkitu berri du koadernoa David Azurza kantariak; Joxemari Iturralde idazlearen bitartez eskuratu dugu, digitalizatu eta hemen argitaratzeko.

        Denera 31 poema dira. Horietatik 10 "Olerki berrizte" bilduman ere argitaratu zituen 1952an (Kuliska Sorta - Itxaropena); beste batzuk lehenago aldizkari ezberdinetan: Euskal Esnalea, Euzkadi, Yakintza, Euzko Deya, La Vasconia, Egan...

        Koadernoaren ezaugarriak:

• Kartoizkoak azalak. Aurrean idatzita dakar: Arrese-tar Emeterio.
• Neurriak: 32 zm zabalera x 20,5 zm altuera.
• Idatziz orrialde kopurua: 55 orrialde.
• Orrialde erauziak: 32 orri: 64 orrialde.
• Orriak zuriz: 30 orri: 60 orrialde.
• Koadernoaren barruan, gutunazal urdin batean: "Goraldi (Gaztelubideko ereserkia)" errepikaturik, gaztelerazko sarrera batekin (denera 2 orri edo 4 orrialde).

        Erauzitako 32 orrien ertz batzuetan antzematen da Emeterio Arresek poemak idatzi zituela haietan. Ez dakigu koadernoak izenburu nagusirik ba ote zuen, ezta ere zein poema falta diren.